هذا ثمر قلـــبي تــــدلى قبل يـاتي موسمه..
مدي يدينك واجمعي فرقاك من عذق العتب...
انا ثملـــــت من الفراق الي خذا وجهي سمه ..
شوفي ملامح غيبتك تقرا قبل لا تنكتب...
في وجهي الشاحب وفي آهات صدري وانسمه..
في ناظر عيون هميل الوجد منها ينسكب...
يانور لحظات غدت من دون وجهك معتمه..
وينك بدا هذا الحنين بجوف صدري يحتطب...
ياحب اجتاح الضلوع وفج قلبي واقسمه ..
نصفين وازريت اجمع النصفين وغيابك سبب...
حب بقى لو واقعه مره بحاليه اصدمه..
عشق حيا رغم العطش في روب روحي معتشب...
ليت الغلا ذنب تجناه الخفوق و يندمه..
وليت الصبر جرم الا طاولت همي يرتكب...
الى متى وانا اهين الوقت وارجع واحشمه..
وانا على رجم الوصال اشرف وانادي وارتقب...
يم العيون الفاترات الناجلات المغرمه..
يامن رموش عيونها تشكي سبب عكش الهدب...
يامبسم له ضحكة تنطق بشي تبهمه..
يانبرة لامن حكت كل المعاني تنقلب ...
يالي خذيتي خافقي قبل اعرفك واقدمه..
يالي غيابك لحن تغنيبه اعواد القصب...
عودي على قلبن طواه الهم والشوق اهزمه ..
قلبن معك غنايمه ضاعت ولا ادري وش كسب...
انا انتهيت وشوقي بصدري بدتله همهمه ..
جمر انتظاري سمدت ناره وانا صرت الحطب...
حتى ثمر قلبي تدلى قبل ياتي موسمه ..
هزي طرف جذعه تساقطلك من عذوقه عتب...